أسرار الميك أب آرتيست.. لو انتي من عشاق المكياج، يبقى لازم تركزي في المقال ده، هقولك على 10 حيل ميكب سرية، مش أي حد يعرفها، وبيستخدمها خبراء التجميل الكبار علشان يحققوا لوكات مثالية وساحرة.
الحيل دي هتغير طريقتك في استخدام المكياج، وهتديكي نتائج احترافية في كل مرة.
أسرار الميك أب آرتيست
1. ماسكارا بتديكي تأثير الرموش الصناعية
علشان تحصلي على رموش طويلة وكثيفة كأنك لابسة رموش صناعية، استخدمي فرشة سبولي نظيفة وغمسيها في بودرة شفافة (Loose Powder)، ومرريها على رموشك قبل وضع الماسكارا.
وبعد كده، طبقي طبقة ماسكارا، استني تنشف، وطبقي طبقة تانية. هتشوفي فرق مذهل في الطول والكثافة!
2. البلاشر يغير شكل وجهك بالكامل
مش بس أداة لتوريد الخدود، البلاشر ممكن يتحكم في شكل وجهك. لو حطيتيه على عظمة الخد وسحبتيه لفوق ناحية الصدغ، هيديكي مظهر مشدود وفريش.
أما لو حطيتيه على تفاحة الخد، هتحصلي على لوك كيوت وطفولي. اختاري حسب المناسبة.
3. الكونسيلر لرفع ملامح الوجه
بدل ما تستخدمي الكونسيلر بس لتغطية الهالات، جربي تحطيه تحت العين، جنب الأنف عند الزاوية الداخلية، وتحت طرف الحاجب. ادمجيه كويس وهتشوفي “lifting effect” طبيعي يخلي وشك منوّر.
4. ثبات الفاونديشن من غير طبقات تقيلة
لو بتعاني إن الفاونديشن مش بيثبت، الحل مش إنك تزودي الكمية. امسحي بشرتك بتونر، وبعد كده حطي بودرة شفافة خفيفة على الأماكن اللي بتعرق.
وبعدين حطي طبقة خفيفة من الفاونديشن. هتلاحظي فرق رهيب في الثبات والشكل الطبيعي.
5. تكبير الشفاه من غير فيلر
لو عايزة شفاه ممتلئة بشكل طبيعي، استخدمي قلم تحديد بنفس لون شفايفك واعملي أوفرلاين بسيط.
وبعدها حطي روج مط، وفي النص نقطة من جلوس أو هايلايتر. الطريقة دي هتخلي شفايفك تبان أكبر بلمسة ناعمة.
6. الآيلاينر المسحوب للمبتدئات
لو بتلاقي صعوبة في رسم الآيلاينر، جربي تعملي نقط صغيرة على طول الخط اللي عايزة ترسميه، بعدين وصليهم ببعض بفرشة دقيقة أو كحل بودر، النتيجة هتكون سحبة أنيقة ومتقنة.
7. بلاشر كريمي لنضارة طبيعية
لو بشرتك جافة أو بتحبي اللوك الطبيعي، استخدمي بلاشر كريمي بأطراف صوابعك قبل ما تحطي البودرة. هيتدمج بسهولة ويخلي شكل خدودك صحي ومضيء.
8. سبراي تثبيت طبيعي من البيت
مش لازم تشتري سبراي غالي، تقدري تعملي واحد طبيعي في البيت. اخلطي معلقة جلسرين صغيرة مع نص كباية ميه ورد ونص كباية ميه معدنية. رشيه بعد الميكب، وهتحسي إن اللوك ثابت وناعم بلمسة طبيعية.
موضوعات ذات صلة..
طريقة تحضير كولاجين طبيعي لشد البشرة وإعادة النضارة في المنزل بمكونات من مطبخك
